بصوا يا شباب المشاركة دى توضيح للبعض
بداية لازم الناس تتفائل وتكون على قدر عالى من الثقة وانا شخصيا مرضى جدا من المعرض ومستوى المعروضات المصرية تحديدا ، طيب هل معنى كدا إن خلاص ما فيش اكتر أو إننا مش عاوزين أفضل اكيد لا طبعا محتاجين اكتر بكتير لأننا نستحق دائما الأفضل ، طيب ليه نتفائل أو تعتبر إن المعرض كان كويس
السبب الرئيسى وقبل ما تحكم وتقارن وتقول الدولة الفلانيه والسلاح الفلانى فيه حاجة أهم والحاجة دى هى المؤشر اللى تفهمه من اتجاه اهتمامنا رايح فين واكتر حاجة كانت واضحه هو الاهتمام بمجال الحرب الإلكترونية عموما يعنى التركيز بشكل كبير على موضوع مجابهة المسيرات وباكتر من منظومة ودا اهم من اقتناء المسيرة نفسها لأن الطائرات بدون طيار بقت متوفرة عند أغلب الدول ولو ما صنعتش انت فسهل انك تحصل عليها من دول كتير لكن الرصد والتصدى لا يزال مشكلة تسبب ارق لكل جيوش العالم تقريبا فدا شىء يخليك تطمن إن إحنا دارسين كويس التحديات الراهنة والمستقبلية ، طيب لو جينا لموضوع مراكز القيادة والسيطرة ومدى التطور اللى حصل فيه خلال الفترة الأخيرة فدا برده مهم جدا خاصة مع جيش ضخم بإمكانيات كبيرة جدا وتمركزات وقواعد كتيرة وعنده تنوع تسليح كبير سواء شرقى أو غربى ودا كله محتاج منظومات ربط وتوحيد مفاهيم وسيطرة بشكل دقيق جدا لأن مهما كانت امكانياتك وقوتك مش هينفع إن قيادة الجيوش الميدانية والفرق تشتغل كجزر منعزلة ومع اختلاف مصادر التسليح يزيد الأمر تعقيدا والحمدلله شوفنا الاهتمام بالشق دا وأصبح عندنا مراكز سيطرة تصميم وانتاج محلى بشكل كامل
طيب النقطة الأهم واللى ناس كتير مش واخده بالها منها إننا فى مصر وضعنا مختلف بمعنى إن كل جهات ومصانع السلاح تتبع القوات المسلحة فأى معدة انت بتشوفها صنعت فى المقام الأول للاستخدام المحلى وصممت وجربت وعدلت اكتر من مرة بواسطة القوات المسلحة ودا معناه إن المعرض بيعرف الدنيا كلها مؤشر تطورك وقدرتك وصلت فين فطبيعى إن دايما هيكون جزء غير مسموح بظهوره أو الإعلان عنه بشكل مفصل ودايما اللى فى الخدمة الفعلية وغير معلن هيكون سابق اللى احنا شوفناه فى المعرض يعنى اللى بيتعرض قدامنا مش دا اخرنا ولا دا كل اللى فى جعبتنا ودا طبيعى لكل دول ، يعنى احنا هنا مش زى بعض الدول بتلاقى المعارض فيها مليانه نماذج أسلحة وماكيتات جزء ليس بالقليل منها لا يدخل إنتاج فعلى ولا كمى ولا يجد أى فرصة تسويقية ودا برده لأن اللى بينتهج السياسة دى بيكون داخل المجال كاستثمار ودا طبيعى ومطلوب وهنا الاختلاف الجوهرى أن كل معدة ظهرت فى الجناح المصرى تخدم بالقوات المسلحة بنسبة تزيد عن ٩٠ ٪ وليس لمجرد العرض
النقطة الأخيرة اللى لازم نفهمها وناس اتكلمت فيها أن احنا بنمسك كل منظومة وندور على النواقص فيها قبل أن نذكر مميزاتها مع إن الأمر المفروض يكون غير كدا ، لأن الأساس هو الأهم بمعنى إن اللى صمم ونفذ وانتج المنظومة سهل جدا أنه يحدثها ويدخل عليها تطويرات باستمرار يعنى اللى عمل طائرة مسيرة فيها ١٠ نقاط تعليق مش هيكون قادر على جعلها تحمل ذخائر ؟ طيب اللى عمل مسيرة بالامكانيات دى مش هيقدر يزود مداها ؟ أو يخلى ليها أنظمة ربط بالاقمار الصناعية ؟ طيب اللى عمل الراجمه مش هيقدر مع الوقت يعدل الصاروخ ويزود عياره ومداه ؟ زى ما قولت الأساس هو الأهم واللى عمل كل دا قادر إن شاء الله على أنه يطور فى المعدة وعاوز الناس تفتكر مدرعة تمساح اول ظهور ليها ويشوف التصميم والامكانيات ويقارن بينها وبين اللى وصلتله التمساح دلوقتي بعد استمرارية إنتاج وتطوير اصدارات بشكل متواصل وهى دى أصل الفكرة
المشوار اكيد طويل لكن إن شاء الله بدأناه وقطعنا فيه شوط مش قليل وبإذن الله تتم الأمور على خير