خلوني اقولكم رأيي بصراحة في الموضوع ده بصفة عامة (توجه الدولة و اهتمامها بمجال تكنولوجيا المعلومات) بما اني من المهتمين بيه و المتابعين ليه من فترة....الدولة من فترة كبيرة و مهتمة بموضوع تعليم البرمجيات و نشر ثقافة العمل الحر من خلال اكتر من مبادرة بتقوم بيها وزارة الاتصالات و جهات تانية و الهدف من ده هو اتاحة شغل بمرتب كويس للشباب من مصر مع شركات بره فيدخلوا عملة صعبة أو حتي انهم يسافروا يشتغلوا بره و الدولة تستفيد من تحويلاتهم للداخل .... ده كلام في مجملة كويس لكن للاسف التنفيذ الواقعي علي الارض سيء جدا ...اقرب مثال هي مبادرة بناة مصر الرقمية اللي الدولة اعلنت عنها من فترة ...المبادرة دي المفروض هدفها انها تعلم عدد كبير من الشباب مجال الذكاء الاصطناعي و تعلم الالة و تعمل شراكة مع جامعة اوتاوا بحيث تديهم شهادة ماجستير مهني في نهاية البرنامج ...كلام نظريا جميل جدا وعلي الورق في اكتر من 1000 متخصص اتخرجوا في مجال الذكاء الاصطناعي.... اللي حصل ان المبادرة اتقبل فيها عدد ضخم من الشباب اتعلموا في فترة وجيزة و اخدوا الشهادة و بعدها انطلقوا لسوق العمل لقوا ان مفيش شغل زي ما اتقال قبل كده ان المستقبل للذكاء الاصطناعي و وظائف في كل مكان الخ....السوق المصري في المجال ده لسه صغير جدا جدا و حتي بره اللي بيشتغلوا فيه بيبقوا ناس اخدوا ماجستير و دكتوراة و عملوا ابحاث فيه و دول بيبقي معظمهم متخرجين من جامعات البلاد دي نفسها مش بيجيبوهم من بره .....نفس الكلام في برامج زي انترنت الاشياء و الحوسبة السحابية و كل ال buzz words اللي السادة المسئولين بيحبوا يتغنوا بيها كل شوية ....الواقع ان السوق المصري و حتي الخارجي غير قادر علي استيعاب كل الاعداد الضخمة دي في الوقت الحالي وبالتالي البرنامج مش بيحقق العائد المرجو منه .....الحلول من وجهة نظري اننا نبطل ندور علي التريندات و نشوف السوق فعليا محتاج اية و نبدأ نأهل علي اساسه في خلال الفترة الجاية....اكتر الوظائف المطلوبة هي برمجيات زي تطوير المواقع و التطبيقات و هي دي اللي مطلوب نركز فيها كتأهيل مهني و نعلم الشباب فيها كويس ....الذكاء الاصطناعي مجال قوي جدا و لكن السوق المصري حاليا مش جاهز ليه والسوق العالمي مش محتاج طلبة من مصر ......لازم كمان جنب اتجاه التأهيل المهني يبقي في مراكز بحثية في المجالات دي هدفها انها تقوم الصناعة دي في البلد عندك لان الدولة مش شغالة مقاول انفار وبس لكن لازم يبقي في مساهمة في تطوير المجالات دي نفسها ....كمان نقطة مهمة تسري علي جميع المجالات التكنولوجية هو ان لازم يبقي في توجه من الدولة للاهتمام بتدريب الطلبة في الشركات من وهي في الجامعة من خلال استحداث نظم دراسة جديدة زي برامج ال co-op اللي موجودة في جامعات كتير بره و اللي الطالب فيها بيدرس ترم وينزل شركة يتدرب ترم عشان يتخرج و هو معاه علي الاقل سنتين خبرة تدريب عملية في مجاله .... في حاجات كتير اوي ممكن تتعمل بس اهم حاجه نبعد الموظفين و اصحاب اللقطة من الموضوع و يتجاب ناس بتفهم