مع كل احترامي لحضرتك ولكن الكلام ده غير دقيق جمله وتفصيلا
في كذا حاجه بيتم اتخاذها في الاعتبار لما بيتم تقييم حجم اقتصاد الدول . على سبيل المثال لازم نضع في الاعتبار حجم الموارد الطبيعية والاسعار اللي هي متوفرة للسوق المحلي بها فعلى سبيل المثال لو انا عندي 200 مليار برميل من النفط وحابب اني ادي البنزين والديزل للناس بتراب الفلوس فده هيكون له تأثير على سعر المنتج النهائي ومش هيكون في تأثير ملحوظ على وفره الدولار من عدمه لان هناك فائض كبير ونفس الشيء ينطبق على العمالة. وعلشان كده فارق القوه الشرائية يساعدنا ان نقيم كافه الاقتصادات بنفس المعيار. لو بصينا على سعر العملة هنجد ان الصين تاني اكبر اقتصاد بعد الولايات المتحدة ولكن اذا استخدمنا حجم الاقتصاد مع مراعاه فرق القوه الشرائية فهنجد ان الاقتصاد الصيني اكبر بكثير من الاقتصاد الامريكي.
نقطه تانية لازم ان احنا نأخذها في الاعتبار هي درجه الشمول المالي في الدولة. الناتج المحلي الاجمالي هو مجمل السلع والخدمات التي تم تداولها في سنه. في دول زي امريكا الشمول المالي فيها عالي فرصد التعاملات التجارية بين الاشخاص اسهل من مصر على سبيل المثال. ولكن بالرغم من ده الاقتصاد المسجل للولايات المتحدة مش هو الحجم الحقيقي للاقتصاد لان في نشاطات كتير غير مسجله دي بتبقى من حاجات بسيطه زي اولاد صغيرين بيشيلوا الثلج من قدام بيت جيرانهم علشان عشره دولار كاش لحد مئات المليارات من الدولارات اللي بتتم عن طريق الدعارة وتجاره المخدرات وتجاره السلاح وغيره طبعا لان الديلر ما بيعملش اقرار ضريبي. السؤال هنا هل حجم الناتج المحلي الاجمالي المسجل في مصر بيعكس حجم التعاملات بين المواطنين من السلع والخدمات? طبعا لا. ده معناه ان انا عندي اقتصاد موازي غير مسجل يقدر بمئات المليارات من الدولارات.
لما نقيس حجم الاقتصاد بالدولار فيجب ان نضع في الاعتبار ان الدولار دلوقتي في موضع قوه كبيره جدا بعيدا عن اعتبارات اخرى اقوى بكثير مما كان عليه قبل الازمه وده بسبب رفع الفيدرالي لسعر الفائدة مما قلل حجم الدولار اللي معروض في السوق العالمي(وهنا انا قصدي جزئيا الاموال الساخنه) . ضيف على كده ان في حرب بتشنها الدول المنتجه للبترول بالإضافة الى العقوبات على روسيا وده يتسبب في رفع سعر برميل للبترول وبما ان احنا لسه ما وصلناش للاكتفاء الذاتي من البترول ومشتقاته فده معناه ان كافه السلع هتتاثر بسبب تلك الزيادة علشان الطاقة دي بيتم استخدامها في صناعه ونقل المنتجات. حتى لو الدوله دعمت سعر الطاقه وسابته كما هو عليه فده هيكون له تاثير سلبي على الجنيه علشان بيعطي المنتج والمستهلك الانطباع ان المعروض من الدولار وفير وده بتسبب في تزايد الطلب على المواد الخام من ناحيه المصنع والمنتج النهائي من ناحيه المستهلك وبما ان المكون المحلي في كثير من الصناعات ضئيل بتسبب زياده تأنيه في الطلب على الدولار وبناء عليه الضغط هيكون مضاعف على احتياطيات الدولة والسوق من العملة.
طبعا ضيف على كل ده ان معظم تعاملاتك مع دول مش بتستخدم الدولار اصلا ولكن انت لا تعتمد على سله من العملات كما يجب ان يكون بالإضافة الى المضاربة في السوق بالإضافة الى الملايين والملايين من اللاجئين الى حرب بتؤثر على مواردك الدولار يه من قناه السويس هتلاقي ان قطعا حجم الناتج المحلي الاجمالي اللي حضرتك بتشير اليه لا يمثل زياده او حجم الاقتصاد الحقيقي. تحياتي
