ماهو بالتأكيد قرار جهات الدولة ، لا هو قراري و لا قرارك !!
لكن هي ايه الدولة ؟
الدولة ارض و شعب و ادارة
و انا فرد من الشعب ، من حقي اقول رأي و اختلف احيانا مع الادارة و اشاور على الغلط لو موجود
و لو انا فاهم غلط ، ادارة الدولة تفهمني الصح !
يبدو انك ما قريتش ، جملتي " مع فرق القياس " ! لما استشهدت بمثال حميديتي
هكرر برضو ، رغم فرق القياس ، الا ان اساس القياس موجود
ايه هو الاساس : منظمة على اساس عرقي او ايدولوجي تحمل السلاح بخلاف جيش الدولة
ايه هو جيش الدولة : هو جهة غير مؤدلجة و غير عرقية و عناصرها من جميع فئات الشعب
مواطنين سيناء على دماغي من فوق ، ناس وطنيين شرفاء و نقول فيهم شعر و مُعلقات
ادوا واجبهم طواعية ، نقولهم شكرا و ناخد منهم السلاح
السلاح و القوة و السلطة ، بتطمع
انهاردة تحت قيادة قبلية وطنية ، بكرة ماضمنش
انهاردة هما متحدين و على قلب رجل واحد ، بكرة ماضمنش
سبحان مقلب القلوب ، الناس بتغير عقائدها الدينية ، مش هتغير قناعاتها الوطنية ؟ !
خصوصاً ان سينا عليها العين و النية و هيكتر العك فيها و اللعب فيها طول ما انت بتحاول تنميها
بلاش نكرر غلطتة السادات لما حب يقضي على الشيوعين ، طلق عليهم اصحاب الاسلام السياسي و الاخوانج و كانت النتيجة وبال على مصر كلها !!
و التاريخ مليان دروس و عبر ..
حاسس ان انا بتهدد في " للمرة التانية " دي
لو كررتها الف مرة برضو مصر هتفضل غالية عليا
و هفضل ضد وجود السلاح في يد اي جهة تانية خلاف الجيش
و كلمتين في العموم ، مالهومش علاقة بالموضوع ده بالتحديد
الدول ما بتتقدمش " بكله تمام " مهما كان الغلط موجود
الدول بتتقدم لما يكون فيه ناس وسطنا تشاور الغلط عشان يتصلح ..