اكتر حاجه بتضايقني في موضوع السو 35 ده هو هبده ان الرفال والسو 35 حصل بينهم مواجهه في مصر. هذا لاني شفت الهبده دي من وهي لسه هبده صغيره وشفتها بسم الله ما شاء الله حسبي الله ونعم الوكيل بتكبر قدام عينيا. الهبده دي طلعت من موقع هندي اسمهIndian Defence Research Wing.
الموقع ده كتب مقاله كيديه يشير فيها الى مقاله تم نشرها من موقع breaking defense بعد الاعلان عن صفقه الثلاثين طياره رافال في 2021. المقاله الامريكيه نفسها بتتكلم عن سهوله ربط المعلومات بين المنصات والطائرات المختلفه عند القوات الجويه المصريه ان هم اتكلموا مع مسؤول مصري في الجيش قال لهم ان مصر بتتطلع في المستقبل للحصول على اعداد اضافيه بتوصل لميت طياره. بعد كده موضوع ربط البيانات ده قالوا انهم اتكلموا مع الاستاذ محمد الكناني وطبعا اي حد مهتم بالشان العسكري المصري يعرفوا وفي المقابله دي هو قال لهم ان الشركات الفرنسيه بتعرض على العملاء انظمه اتصال وربط للبيانات مع الطائرات المختلفه بما فيها الطائرات الروسيه ودي المره الوحيده في المقاله دي اللي سيره السخوي 35 اتجابت فيها على اساس الربط ما بينها وما بين الرافال. وهي دي المقاله
فيقوم الموقع الهندي هابد هبده الموسم وكل موسم لان في 2020 و2021 كان هناك عده اشتباكات ما بين الجيش الهندي والجيش الصيني على الحدود ما بينهم. اخر صفقه خارجيه بالنسبه للطيران اتعاقدت عليها الصين كانت السو 35 وروسيا سلمت الطلبيه باكملها في سنه 2019. اما بالنسبه للهند فطبعا الكل عارف ان هي اتعاقدت على 36 طياره من طراز رافال استلمت اخر دفعه منها السنه اللي فاتت. من هنا جت الفكره اللولبيه الجهنميه لصحاب الموقع ده انهم يالفوا حكايه الرافال مع سو 35 في مصر وان ده كانت دافع لمصر ان هي تزود طلبيه الرافال ب 30 طياره على اساس انهم يحلوا محل السو 35. نقول تاني.... المقال الهندي بيقول ان كل الكلام ده اتقال في المقال بتاع breaking defense وده ما حصلش.
قبل كده كان الموقع ده فشخ المنطق وقال أن مقاتلة سو 30 هندية تبعت طائرة جي 20 صينية وإن الرادار إللي على السو30 يقدر إنه يكشف ويتتبع المقاتلات الشبحية
ف نفس الموقع إللي كان بيقول إن رادار سو 30 يقدر إنه يكشف ويتتبع الجي 20 هو نفسه إللي جه بعد كده وقال لك إن الرادار إللي أحدث مقدرش إن يلقط الرافال.
بعد كده يقوم صحابنا في بولندا في موقع اسمه defense24 ياخذ المقال بتاع اخونا الهندي ويزود من عنده سيناريوهات تخليك تتخيل ان المواجهه اللي بيقولوا ان هي حصلت دي حصلت في حكايات الف ليله وليله وادى المقاله
. طبعا بولندا مفيش بينها وبين روسيا عمار وعلشان كده عادي جدا ان هم هيلاقوا ان دي فرصه ان هم يسيئوا لروسيا والسلاح الروسي. طبعا للتذكره بولندا دي هي الدوله اللي وزير دفاعها طلع علينا باشاعه ان مصر هتسلم حاملات الطائرات من طراز مستيرال لروسيا بسعر رمزي وهو دولار واحد بعد استلامها من فرنسا احلى مصدر لعيونكم
. انا السنه اللي فاتت كنت كتبت مقاله عن ليه مصر مش هتدي اوكرانيا مقاتلات mig 29 اللي عندها زي ما الهبيد بتاع مجله فوربس طلع وقال وكان في مقالته بيسيء للسلاح الروسي وبيستشهد بخرافه المواجهه ما بين الرافال وما بين سو 35.
في المقاله انا دققت في كل التفاصيل بتاعه الموقع الهندي وليه اللي اتقال ده تخلف. مثال بسيط جدا من التفاصيل دي ان الروايه الاصليه اللي قالها الموقع كانت بتتكلم على اساس ان الرادار اللي تم التشويش عليه هو رادارBARS اللي هو في السو 30 مش السو 35. برضو طلع رد محترم من الموقع الروسيtopwar عن الهبده دي ممكن تقروه هنا
طبعا إللي عايز يترجم يترجم ولكن أنا محتاج أنام دلوقتي..
في الرد بتاع الموقع الروسي ممكن برضه تأخذه نظرة على التعليقات.وفيها هنود نفسهم بيضحكوا وبيقولوا آه طبعا لازم تكون حقيقة.بما إن الموقع هو الموقع الهندي ده
يعني هما نفسهم مش بيثقوا في الموقع ده