أنا في حاجة حابب اتكلم فيها إذا تسمحوا لي طبعا
وهي بخصوص السياحة وشرطة السياحة وإدارة المناطق السياحية
أنا طرحت الموضوع ده قبل كده وأتناقشت فيه مع اصدقائي بالمنتدى وحابب اطرحه مرة تانية بناء على تجربة حديثة حصلت وهي اني ترددت على المتحف المصري بالتحرير مرة اخرى املا في اني اشوف تغير ولكن يبقى الحال كما هو عليه بالنسبة لشرطة السياحة وبالنسبة للعاملين في قطاع السياحة حقيقي اتمنى انه يتم اعادة هيكلة شرطة السياحة من اولها لاخرها ويتم السماح فقط بعاملين ذو لغة وادب ومهارات تعامل مع السائح
يعني مثال على موقف حصل امام عيني اليوم وهو ان كنا في قاعة تحتوي على اثار من الذهب ممنوع فيها التصوير وكان في سائحة بتصور بالموبايل وده طبعا غلط لكن العاملة الموجودة في القاعة قعدت تزعق لها بأسلوب في منتهى القذارة وحتى بلغة انجليزية في منتهى الركاكة والجهل في المعاملة يعني حتى لو السائح على علم بانه ممنوع التصوير وعمل كده الاسلوب بيفرق فعلا وده ابسط مثال وممكن اطرح أمثله كتيرة من الفهلوة اللي السائحين دايما بيشتكوا منها
واتمنى متزعلوش مني اني طرحت حاجة زي ديه في الموضوع هنا لكن لان الموضوع بيتكلم على النهضة بالسياحة فحبيت اشارك أسرتي موضوع بيأرقني أنا شخصيا