موافق معاك فى بعض اللى حضرتك كتبته على قدرة الاحتمال وحركة السوق ولكن السوق اصلا مش بيدور بنفس سرعته من أول جائحة كورونا والسوق حركتة بطيئة اصلا من ساعتها.
بالنسبة لوقوف المستورد وحركة دورة رأس المال
احنا عارفين كويس أنها بتتعوض والتعويض بيتم ازاى فاى تأخير أو وقت أهدر فى الاخر بيتم إضافته على السعر النهائي حتى لو بقدر بسيط صحيح التعطيل اثر لكن لم يخسر المستورد أو التاجر بشكل يمنعه من الاستيراد أو حتى تغير المنتج بمنتج اخر يكون مطلوب
وأيضاً علشان اكون منصف بيحصل أن فى تجار أو مستوردين يخرجوا تماما من سوق معين كانوا فيه بسبب الظروف
بالنسبة للمصانع فهى طبيعة عملها بيجعل مسألة الوقت مدارة بشكل مختلف وحسابات الاستيراد بتكون مجهزة بشكل اخر بسبب طبيعة الانتاج ومراحل التشغيل وايضا هذا لا يمنع أن بعض المصانع بتوقف منتجات لعدم قابلية السوق لسعرها وايضا فى بعض الأحيان وهى بسيطة أن يكون السبب خلل فى إمداد المواد الخام وصعوبة الحصول عليها.
أما بالنسبة لقصة البيانات التى تظهر بدون ترتيب أو أنظار فالحقيقة أن كل القرارات التي تمت كنا كاصناعة نعلم بها وكنا متابعين مع غرفة الصناعات والبنوك و وزارة الصناعة و تحدث الصناعة يعنى المعلومات ما بتطلعش بتسريب بالنسبة لنا ويمكن يكون ده بيحصل مع الصناعة بشكل مختلف عن الاستيراد العادى
ولن اعلق على الكلام الخاص بالرئيس وزى ماقلت لحضرتك من قبل الصناعة بها صدمات فى التشغيل وفى حركتها طبيعية ومتعارف عليها من تراكم الخبرة والشغل وبيكون معمول حساب أسوأ وضع والحقيقة أن كمان الصناعة خرجت من أسوأ وضع حصل فى تاريخها وهى ثورة يناير وما حدث من أثار ترتبت عليها.
والحقيقة أن نجاة البلد والشركات وكل الظروف التى حدثت هى من ستر ربنا لولا ربنا كان زمان البلد كلها خارج الخدمة
وتحياتي لحضرتك
