و هنا سؤال يطرح نفسه بموضوعية شديدة
هل معايير المنافسة العادلة متوافرة بين شركة قطاع خاص و بين الهيئة العربية للتصنيع ؟
لو معايير المنافسة العادلة متوافرة ، يبقى راجل غلطان و ابن ستين كلب انه بيتوسع برة مصر
لكن لو كانت معايير المنافسة غير متوفرة ، انا مقدرش ألومه .
لانه في النهاية ده رجل اعمال بيدور على مصلحته و على مكسبه
و بتبسيط مُخل على معايير المنافسة
لو تكلفة وحدة المنتج من مصنعه هتكون اكبر من تكلفة وحدة المنتج من مصنع قطاع عام
بالتبعية سعر بيع وحدة المنتج من مصنعه هتكون اعلى من سعر بيع وحدة المنتج من مصنع قطاع عام
و بالتالي هو مش هيعرف ينافس ، لانه لو نزل بالسعر خسر و لو توقف عن البيع خسر
احنا بنتكلم عن مستثمر و واضح انه شاطر
و المستثمر بيحسب كل مليم قبل ما يصرفه
و بيحسب التكلفة و العائد
ففكرة ان هو خسران انه بيتوسع في مكان تاني دي ، منطقياً مش مظبوطة
و لان مالياً صعب التقييم الحقيقي لتكلفة مصنعه هنا و هناك
لان ده محتاج مكتب استشاري مالي متخصص يقيم التكاليف و العوائد و محتاج معلومات و داتا
لكن كلامنا باللي متوفر من معلومات بقراءة سطحية
فإن حوافز زي اللي متقدماله دي ، مش قليلة
و تفرق في اي تكلفة و تفرق في اي عائد
👇
اما عن الرواتب
فالراجل في مصر جاب خبرا المان لمدة سنة يعلموا العمال و الفنيين اللي عنده
و بالتالي العامل او الفني اللي عنده مش مجرد عامل يقدر يستبدله بسهولة ، لا ،، الراجل استثمر فيهم و علمهم و بالتالي تمسكه بيهم هيكون كبير
و اقل مظاهر التمسك ده ان رواتب الناس دي مش قليل ..
رواتب العمال في السعودية ، انا معرفش عنها حاجة
لكن اللي اعرفه ان معظم العمالة هنود و بنجالة
و دول رواتبهم متدنية ، و من رابع المستحيلات ان راتب العامل الهندي او البنجالي يوصل ل1000 دولار في الشهر
و ياريت لو حد ما الاعضاء عنده خلفية برواتبهم ، يفيدنا
كل القراءة المالية دي ، مجرد قراءة سطحية
لأن التحليل المالي الحقيقي محتاج معلومات بالارقام عن المصنع في مصر و نظيره في السعودية
و لا انا و لا انت نقدر نقول أي الخيارين اكثر ربحية بالنسباله
التوسع في السعودية و لا التوسع في مصر
لكن لو سيبنا المنطق يقول كلمته
هيقولك
ان مافيش رجل اعمال الا و شغله الشاغل في مشروعاته هي " تخفيض التكاليف و تعظيم العوائد "
فالراجل بالمنطق مش هيروح هناك عشان يخسر نفسه ارباح كان ممكن يعملها في فرصة بديلة في مصر !
