سيبنا من الحجج الضعيفة اللي بنستخدمها لتبرير مواقفنا الغير منطقية دي ياستاذ صانع
الروس مدخلوش الحرب علشان الحرية والعدالة بلابلابلا فالحقيقة هجومهم علي اوكرنيا بيتعارض مع حق اصيل من حقوق الاستقلال وهو حق الامم في تقرير مصيرها
يعني حقها في الانضمامء لاي تحالفات او احزاب
بما يخدم مصالح شعبها
وفي سؤال هنا عايز الناس تجوبني علية
اية الافضل لاوكرانيا اقتصاديا مثلا علي سبيل المثال انضممها للاتحاد الأوروبي ولا البقاء كدوله فقيرة عايشة في ظل الاتحاد الروسي
يعني لما نقارنها باخوتها الصغار من دول البلطيق ليتوانيا حصلت علي استقلالها بعد انهيار الاتحاد السوفيتي وفي اول ايامها كدولة وليده شعبها حرفيا كان بيأكل من الزباله
بص عليها دلوقتي كواحدة من افضل دول العالم في مستويات المعيشة مين فالدنيا له حق انه يقول للاوكرانيين انهم ممنوع عليهم تجربة مماثلة . السبب الحقيقي وراء الحرب هو محاولة روسية اخيرة لاستعادة محيطها اللي خسرتة بسبب فشلها في انها تكون نموذج ناجح جذاب للجمهوريات السوفيتية السابقة
وحاجة تانية ان وجود دوله سلافية غنية وقوية هو تهديد في حد ذاتة للاتحاد الروسي الحالي اصل الشعوب بتغير من بعضها والشعب الروسي اصلا شايف جيرانة الاوروبيين وحتي
الجمهوريات السوفيتية عايشين في مستوي حياه ميحلمش به المواطن الروسي العادي
وعندهم ديموقراطية وحقوق انسان ودا برضو في حد ذاتة تهديد حقيقي للنظام الروسي الحاكم مابالك بقي لم يشوفو اوكرنيا اللي هي اصلا اخواتهم من الاب والام بقت دولة افضل منهم علي كل المستويات اكيد هيكون عندهم رغبة لتكرار نفس التجربة .يراجل دا احنا عملنا ثورة في ٢٠١١ علشان اشمعنا تونس
الحوار دا ممكن تقيسه زي ماهو كدا في حاله تايون والصين وان اختلفت التبريرات
وبعدين مين قالك ان امريكا ملهاش هيمنة تامه علي العالم من بعد سقوط الاتحاد السوفيتي ويمكن من قبل كدا كمان .امريكا واتباعها مش مستنين اوكرنيا علشان يسيطرو علي القرار الدولي
انا حاولت اشرح وجهه النظر من منظور اوكرانيا لاني ملاحظ غياب تام لحاجة مماثله فالمنتدي هنا .وطبعا الروس لهم وجهه نظر محترمة وانا نفسي باميل للتعاطف معاها وهو انهم دوله قوية ولها هيبة ولازم تحصل علي الاحترام الغربي بالذوق او بالبلطجة ودا حق من حقوقهم بس زي مقولت قبل كدا برضو متبقاش بلطجي وفاشل