قريت تويتات تركي الحمد اللي بدأها بإن الحديث عن مصر "ليس كالحديث عن أي دولة عربية أخرى"، وإن "الحديث عنها هو حديث عن مصير عربي مشترك"..
ومن المنطلق ده حبيت أرد على تركي الحمد، علشان يبدو إن في حقائق تاريخية غايبة عنه، ده غير إن قرايته للواقع الحالي أقرب لإعادة صياغة ركيكة لحلقات معتز مطر..
شوف يا سيد تركي..
مصر لا هي أسيرة لصندوق النقد، ولا لأي مؤسسة أو دولة أخرى، لكن احنا دولة تعدادها ١٠٠ مليون، عندها تحديات ضخمة، خاضت في تاريخها حروب عنيفة دفاعا عن المنطقة كلها، وماعندهاش بترول أو أي ثروة تصرف منها وماتحتاجش تشتغل.. ماعندهاش غير عقول بتفكر وبتسابق الزمن..
العقول اللي بكلمك عنها في كل المجالات، ومش هكلمك عن السياسة، خلينا في الفن.. شوف الدولة اللي تاريخها مليان بالأزمات دي عندها فن وإبداع شكله عامل ازاي؟ احنا عندنا فن بنزكي بيه على أشقاء لينا، وعندنا فنانين ومبدعين مش عارفين نوديهم فين والعيون كلها عليهم لإن مفيش زيهم..
صحيح مصر ماعندهاش إمكانيات مادية ضخمة.. لكن هل من الكياسة إن حد في سنك وخبرتك يا تركي، يعاير دولة زي مصر بضعف إمكانياتها المادية؟ الفقر فقر العقول، وانت عارف العقول المصرية كويس جدا، العقول دي في آخر ٩ سنين عملت معجزات رغم التحديات الضخمة والإمكانيات الضعيفة، فتخيل مثلا لو كان عندنا ثروة نفطية كنا ممكن نبقى فين؟
المعايرة حمقاء جدا..
الأكثر حمقا، هو الهجوم على الجيش المصري، اللي انت عارف كويس اوي إنه صمام أمان في المنطقة كلها مش بس في مصر.. وبردو مش من الكياسة إن حد في سنك وخبرتك يمدح الملكية ويهاجم الجيش، ويتغافل عن إن الملكية كانت شغالة عند الاحتلال وإن ثورة ٥٢ هي اللي خلت للدولة المصرية دلوقتي شأن.. ولا انت موضوع الاحتلال ده بالنسبة لك عادي؟
الثريد اللي انت كتبته أحمق يا سيد تركي، مش لإنك بتهاجم الدولة المصرية، لكن لإنك ماعملتش سيرش على أي حاجة من اللي بتقولها واتفرجت على فيديوهين للمطاريد وأعدت صياغتهم بركاكة..
وبالمناسبة.. المطاريد اللي ياما هاجموا بلدك انت شخصيا، فرحانين جدا بالثريد ده.. ففكر كده انت بتعمل ايه ولصالح مين!