واضح انه اسكريبت و اتوزع ، او على الاقل فيه ضوء اخضر لطلق كلابهم علينا
و واضح برضو ان فيه إنًّ في الموضوع
لو ماكانش ايران تبقى الجزر ، لو ماكانش الجزر يبقى ملفات تانية هتبان مع الوقت
الرد بنفس القدر و المستوى مطلوب ، بس مش على استحياء زي ما عمل محمود بدر عضو مجلس النواب
و إن عدتم عدنا ..
انا مبسوط من اللي حاصل ده ، لانه بيكشف وشوش و اوراق للي مش متابع و مش عارف وشوشهم الحقيقية
بس يارب يكون عندنا ردة فعل لوضعهم عند حدهم
مبدأياً كده لازم نحط مثياق اعلامي عربي يمنع قنوات اخبارية او ترفيهية مسماه بإسماء دول ( و ده مش هيحصل غير لما اللي بيعملوا كده يدوقوا من نفس الكاس )
خصلنا من قصة الجزيرة مصر طلعلنا العربية مصر و ام بي سي مصر
كل ده لان عندنا شوية عملاء في الاعلام المصري
و انا قاصد جدا كلمة " عميل " لانك مش بالضرورة تكون جاسوس عشان تكون عميل لبلد اخر
انما لما تكون اداة اعلامية لمشروع دولة تانية على حساب بلدك ، يبقى انت بالتأكيد عميل
و ده ينقلنا لنقطة تانية هي قفل حنفية سرقة كوادرنا من القوى الناعمة
زمان فرغوا مصر من كوادرها الاعلامية و بنوا محطات اخبارية و في الاخير المحطات دي سيطرت على المنطقة و اول ما هاجمت ، هاجمت مصر
و الامر اتكرر مع اكتر من دولة خليجية ، و للاسف احنا محلك سر و مافوقناش لنفسنا غير متأخر بعد ما بساط الاعلام ما اتسرق من تحت رجلينا
و حتى لما فوقنا و عملنا قناة اخبارية ، مافوقناش صح و ليا مآخذ كتير على قناتنا الاخبارية و خطواتنا المنعدمة على السوشيال ميديا بشكل عام !!
تفريغ مصر اعلاميا بيتكرر ، لكن على مستوى القوى الناعمة من كوادرك الفنية و الثقافية
و اصبحت عاصمة ال سعود قبلة للفن و المثقفين المصريين
لو ماقفلناش الحنفية دي هنخسر قوتنا الناعمة مع الوقت ، لو ما عملناش حدود للتعاون الثقافي ، هنتسرق حرفياً
و مش هيكون لينا صوت او تأثير ثقافي او فني في المنطقة زي بالظبط وضعنا الاعلامي المثير للشفقة!
و في الاخير .. الاقتصاد ثم الاقتصاد ثم الاقتصاد
قادر اقتصادياً ، انت قادر على كل حاجة حرفياً
و الراجل في النقطة دي مش مقصر ، يمكن نختلف مع معالجة بعض الامور ، لكن في الاخير الراجل شغال و عينه على الاقتصاد
لولا سوء الحظ من كرورونا و تبعاتها من ازمة سلاسل امداد ، لحرب عالمية تالتة و ازمة تضخم مستوردة و هروب الاموال الساخنة من الاقتصاديات الناشئة ، كان هيكون لينا شأن تاني خلال الخمس سنين اللي جاية
لكن قدر الله و ماشاء فعل ..
المهم نكمل شغل و ندرس تاريخ كويس و نعرف ان مافيش حد عايزك احسن منه
لا تقولي اخوة و لا عرب
و اخوانك العرب اقربهم زي بعيدهم ، يمكن فيهم اللي مش عايزك تقع ( عشان لو وقعت هيقع وراك ) ، لكنه في نفس الوقت مش عايزك تقوم و تجري
هو عايزك واقف يدوب بالعافية صالب طولك ، لا تقع و لا تقوم و تجري و تكبر عليه .
لغة القوة و المصالح هي اللغة اللي بيفهمها الكل
طول ما انت قوي و بتدور على مصلحتك فين ، طول ما انت ليك مكان في الكوكب ده
غير كده ، هننتهي و تنتهي هويتنا و هنبقى حاجة تانية غير مصر اللي نعرفها .