ما تيجي انا وانتا قبل ما نتكلم عن الاحداث في السودان، نفهم الاول يعني ايه "سودان" وبتتكون من ايه؟ يمكن نفهم اسباب الصراع ..
بصوا، عشان نبقا فاهمين الدنيا كويس، لازم نتكلم عن السودان من حيث الديموغرافيا، التركيبة السكانية والعرقية، واللي ميعرفش فالسودان قبل ١٨٢١ يعني قبل الغزو التركي للسودان ايام محمد علي باشا، كانت عبارة عن اثنيات وممالك مسيحية وسلطنات اسلامية متفرقة، ومتوحدتش قبل القرن العشرين، واستقلت تماما سنة ١٩٥٣م وبقت دولة واحدة ليها حدود سياسية وحاكم.
بس بإختصار، فضلت دولة متعددة الاعراق والاثنيات، متجمعين كلهم في دولة واحدة، بس متنوعين ثقافيا وعرقيا.
طيب نخش في الموضوع ..
السودان بتتكون عشر مجموعات رئيسية، تحتها ٥٣ مجموعة ثانوية، بمجموع ٥٧٩ قبيلة، و٥٧ مجموعة عرقية على أساس الخصائص الإثنوغرافية والثقافية واللغوية، شعبها بيتكلم ١١٤ لغة مكتوبة ومنطوقة غير العربي، متقسمين مابين الشمال والوسط والغرب والجنوب والشرق والجنوب، والجنوب نفسه متقسم كمان، نفردهم سوا طبقا لدراسة بترجع لسنة ٢٠١٢م.
اول المجموعات العرقية هي العرب ..
- عددهم ٢٣ مليون عربي في السودان بنسبة ٥١٪ من مجموع السكان ..
اولهم الجعليين: ودول عرب عدنانيين، متقسمين لقبائل منهم "الميرفاب والرباطات والمناصير والشايقية والركابية والبديرية والجوامعة والبطاحين وغيرهم" بنسبة ١٣٪ من اجمالي السكان".
ثانيا الجهنية: ودول عرب قحطانيين، منهم قبيلة رفاعة وبطونهم، ساكنين في البطانة وحوض النيل الازرق، بنسبة ٨٪ من عدد السكان، وقبائل البقارة ودول هاجروا من مصر في العصور الوسطى وقعدوا في كردفان ودارفور، ونسبتهم ٩٪ من عدد السكان، بالاضافة ل١٢ مجموعة عربية تانية.
تاني المجموعات هما الغربيين ..
- ودول عددهم ١٢ مليون نسمة بنسبة ٢٦٪ من السكان، متقسمين لاربع مجموعات عرقية، اكبرهم هي قبائل شرق دارفور ٢٠٪ منهم، والقبائل النيجيرية عددهم ٧٪ منهم.
- اما القبائل التانية فا منهم الهبانية، وأولاد راشد، وحزام، وأولاد حميد، والحوازمة بني سليم، والرزيقات، والتعايشة، وبني هلبة، والمسيرية، والفلاتا وغيرهم.
تالت مجموعة هيا البجا ..
ودول تقريبا ٢ ونص مليون تقريبا بنسبة ٦٪ من اجمالي عدد السكان، قاعدين في عُشر الاراضي السودانية من العطبرة والنيل غربا البحر الاحمر شرقا ومن اثيوبيا جنوبا لاسوان شمالا.
متقسمين لاربع مجموعات عرقية
البشارية: ودول متقسمين بشارية ام علي في الشمال وبشارية ام ناجي في الجنوب، وعددهم ١٦٠ الف تقريبا
الامارار: عايشين جنوب البشارية وقاعدين من مسمار لبورسودان وعددهم ١٦٠ الف بردو
الهدندوه: ودول قاعدين من سواكن لسنار وعددهم مليون
بنو عامر: عددهم ٨٠٠ الف تقريبا وقاعدين في دلتا خور بركة
وجنب الاربع مجموعات الكبيرة دول فيه مجموعات صغيرة بتحسب نفسها عالبجا، وعددهم ٥٧٠ الف نسمة تقريبا، زي الارتيقا والشيعاب والحالنقا والكميلاب وغيرهم.
رابع المجموعات وهما النوبيين ..
- عددهم ٢ مليون نسمة بنسبة ٥٪ من اجمالي عدد السكان، وعايشين في المنطقة مابين مصر والسودان، ومتقسمين خمس مجموعات عرقية ٣ منها في السودان وهما الدناقلة والمحس والسكوت، والاتنين المصريين هما الفديجة والكنوز
خامس المجموعات وهما شعب نوبا ..
- دول غير النوبيين، عايشين في هضاب النوبة في كردفان فا اتسموا نوبا، من اصل إفريقي، عددهم ١.٨ مليون نسمة بنسبة ٤٪ تقريبا، متقسمين لخمسين مجموعة عرقية وكلهم مستعربين.
سادس المجموعات وهما النيليين الاصليين ..
- ودول قاعدين في جنوب السودان على ضفاف النيل، عددهم ١.٦ مليون نسمة، بنسبة ٣.٥٪، متقسمين لمجموعات بردو بس اكبر مجموعتين هما الآتي ..
الدينكا : قاعدين في اقليم بحر الغزال او بحر العرب على حدود اثيوبيا، وعددهم ٩٠٠ الف تقريبا..
النوير : عددهم ٧٠ الف تقريبا، وعايشين على اعالي النيل في اقليم المستنقعات عند النيل الابيض، وقاعدين على مساحة ٣٠ الف ميل من جنوب السودان.
بجانب مجموعات تانية اصغر زي الفونج والانواك والاشولي واللو واللافون والباري والمابان والمندري وغيرهم.
سابع المجموعات هما السودانيين الاصليين ..
- اسمهم قبائل الزاندي الغير نيلية، عايشين في الجنوب الغربي للسودان وعددهم ١٢١ الف، وبينتموا للعرق الإفريقي، بنسبة ٠.٢٪، اصلهم من قبائل البانتو الافريقية، وكان اسمهم تاريخيا "نيام نيام"، بالاضافة لقبائل تانية زي المورو والفيري والمادي والبونكوباكا ونولجوسير وغيرهم.
تامن المجموعات هيا النيلية الحامية ..
- ودول عددهم بتاع ١٠٠ الف وشوية، مكونين من قبائل صغيرة زي المورلي والديدنجا والبويا والتبوسا واللاتونكا وعايشين في المنطقة الاستوائية.
تاسعا المجموعات العرقية التانية ..
- ودول اللي مش سودانيين، وعددهم مليون نسمة، مابين قبائل مش معروفة، ولاجئين، وغير سودانيين، ومغاربة، وافارقة وتشاديين وليبيين وكل اللي نفسك فيه، ومليون ده عدد مش صغير للعلم.
كل دول عايشين في السودان شماله وجنوبه، كل مجموعة منهم ليها عاداتها وتقاليدها، لهجتها ولغتها، لبسها واكلها، دينها ومذهبها، وكل دول فيه منهم اللي عنده اطماع، واللي عنده تطلعات، واللي عايز يكبر قبيلته، واللي عايز يوصل، واللي عايز يعيش في هدوء.
كل دول هما المكون الاساسي لدولة السودان الشقيق، وبسبب تنوع الثقافات والاعراق دي، بيحصل دايما الخلاف، والتنوع العرقي والإثني ده هو السبب الرئيسي في كل المشاكل السياسية اللي بتمر بيها السودان اليوم، بيسميها الخبراء في الحالة دي دولة "عدم التجانس العرقي".
فا نسأل الله يعديها على خير، ومنشوفش السودان بيتقسم زي ما برة عايزين، ويعديها على اهالينا في السودان بخير يا رب.
شكرا ❤️