- إنضم
- 18 نوفمبر 2021
- المشاركات
- 1,524
- مستوى التفاعل
- 7,361
- المستوي
- 2
- الرتب
- 2
الخميس اللي فات كنت في زيارة لمصنع في بلقاس
الزيارة استمرّت لمدّة ساعتين للمناقشة بخصوص إدارة المشروع وتوسّعاته
-
الأسبوع ده
يوم الأحد كنت في زيارة لمصنع في العاشر من رمضان - لمقابلة مهندسة مكتب التصميم اللي بيصمّموا المصنع الجديد التابع لنفس الشركة
المقابلة استمرّت لحوالي 3 ساعات بنناقش فيها تباديل وتوافيق عن التصوّر الأمثل لتصميم المصنع الجديد
بعدها نقاش مع الشركة الصينيّة المصنّعة للخطّ عشان نوفّق كلام الاستشاريّ المدنيّ مع مصنّع خطّ الإنتاج
-
يوم الإثنين كنت في زيارة لمصنع في القناطر الخيريّة
النقاش استمرّ لمدّة 4 ساعات عن تباديل وتوافيق في إدارة المشروع وتوسّعاته والدخول في شراكات وتوسيع نشاط الشركة من صناعيّ لصناعيّ وتجاريّ
-
يوم الثلاثاء كنّا في أكتوبر مع بعض عملائنا لزيارة شركات تصنيع الماكينات والإطّلاع على إمكانيّاتهم في التصنيع ومواصفات الماكينات المتوفّرة لديهم لاختيار الشركة اللي هنشتري منها ماكينة لمصنع جديد
والأسبوع الماضي كان فيه زيارة مشابهة لشركات منافسة في العاشر من رمضان
وزيارات لأكثر من مصنع إيجار في العاشر لاختيار مصنع مناسب للإيجار
-
يوم الأربعاء كنت في زيارة لمصنع في ورّاق الحضر
والنقاش استمرّ لمدّة 4 ساعات عن مواجهة مشاكل المشروع والتخطيط لتوسّعاته
4 ساعات بنعصر فيهم دماغنا للوصول لحلول لمشاكل - والترتيب الأمثل لتوسّعات مستقبليّة
-
ترجع تلاقي حدّ كاتب لك كومنت ببساطة ( مصر ما فيش فيها صناعة - المناخ غير مناسب للاستثمار )
-
الحقيقة إنّ الفرق بين أصحاب المصانع دول - أو المقبلين على عمل مصانع
وبين الناس اللي بتدخل على الفيس تحبّط نفسها وتحبّط الناس معاها هو ( #طريقة_التعامل_مع_المشاكل )
-
فيه ناس عاوزة المشاكل ما تبقاش موجودة - وناس عاوزة تعرف ازّاي تتعامل مع المشاكل
ده الفرق بين الناس العاديّين - والناس المستثمرين أو المقبلين على الاستثمار
-
الناس العاديّين متخيّلين إنّ المطلوب هو إنّه ما يبقاش فيه مشاكل - يبقى المناخ مناسب للاستثمار - وتبقى كلّ المصانع المتاحة للإيجار مناسبة للمصنع اللي عاوزين نعمله
-
وتبقى كلّ شركات تصنيع الماكينات بنفس القدر من الكفاءة - وتبقى مشاكل المصنع بتتحلّ لوحدها
-
ويبقى فيه كاتالوج نفتحه نلاقي فيه التصميم الامثل للمصنع الجديد بدل ما نقعد 3 ساعات مع الاستشاريّ
وإنّك توصل للاستشاريّ بسهولة أصلا - إحنا قعدنا شهر نشتغل على انتقاء الاستشاريّ حضرتك - وزيارات ومقابلات وعروض أسعار وتفاوض
-
وتبقى المبيعات سهلة - ومندوبين المبيعات فاهمين هيعملوا إيه - ومدراء المبيعات أمناء
-
والعمّال مخلصين - ويشتغلوا بدون مناهدة
-
وتبقى الشراكات سهلة وسلسة - مش محتاجين نقعد 4 ساعات نتناقش في تباديل وتوافيق للشراكة من طرفنا فقط - ولسّه هنشوف تباديل وتوافيق الطرف الآخر
-
وتبقى لو عاوز تنقل مصنعك من قرية أو منطقة سكنيّة لمدينة صناعيّة يبقى الموضوع سهل ورخيص - وهتروح تلاقي العمّال مستنّيينك - والإيجار رخيص
-
الفرق بين نوعيّة البشر دول هيّا في طريقة تعاملهم مع المشاكل
بينما المحبطين عاوزين الفرق يكون في المشاكل نفسها - تتحوّل من كونها موجودة - لإنّها تكون غير موجودة - ونخلص بقى
-
لكن عقليّة المستثمر أو المقبل على الاستثمار بتقول - إزّاي نتعامل مع المشاكل الموجودة
-
واحد عاوز المشاكل ما تحصلش - وواحد عاوز يعرف ازّاي يتعامل مع المشاكل
ده الفرق ببساطة
-
كما قال بروس لي - لا أتمنّى أن تكون حياتي سهلة - ولكن أتمنّى أن يمنحني الله القوّة لمواجهة صعوباتها
-
فلو سمحت لو حضرتك لسّه لا تمتلك عقليّة المستثمر - تابع في صمت
ما تبقاش واخد معلوماتك عن البيزنس من فيلم سلام يا صاحبي - وواخد معلوماتك عن الاستثمار من عمرو أديب
وتدخل تقول لي ما فيش استثمار - كلامك بعيد عن أرض الواقع
لإنّي لو عترت فيك في أرض الواقع بعد اللفّ اللي بلفّه ده - هنيئا لك
-
#أنا_شلت_لك_يا_زمن_الحمل_ما_كلّيت
#ومشيت_معاك_يا_زمن_لفّيت_ولا_خلّيت