13 ألف مصنع تستعد للدوران.. كنز الصناعة اللي هيرجع
إزاي مصر عندها الاف المصانع المتوقفة وسايبة الملف الخطير ده وفي نفس الوقت بستثمر مليارات الدولارت في انشاء مصانع ومجمعات صناعية جديدة وإزاي اخيرا الحكومة قررت تحل الملف ده وايه الاضافة للاقتصاد.. كل ده هتعرفه مع حضراتكم في الفيديو ده.
لو دورت في أسباب نجاح وثراء الاقتصاد الأمريكي والأوربي وكندا واليابان وكوريا وحتي الصين هتلاقي عشان عندهم صناعة قوية متقدمة واسعة وكفاية تعرف إن الصناعة في أمريكا بتساهم في الناتج المحلي الإجمالي بـ 3.5 تريليون دولار وشغال فيها 20 في المية من الايدي العاملة في الولايات المتحدة كلها والصناعة نفسها اللي خلت الناتج المحلي الإجمالي يعدي الـ3.6 تريليون يورو.. ودا اللي بينقص مصر.. ودول العالم كلها بيتنافس عشان تجذب المستثمرين يبنوا مصانع عندها طيب تعمل ايه لو عرفت إن في مصر أكتر من 13 ألف مصنع واقف عشان اسباب كان ممكن تتحل لكن الادارة اللي كانت بتدير مقدرتش تاخد قرارات جديدة.
أيوا مصر فيها أكتر من 13 ألف مصنع متوقف لاسباب مختلفة حضرتك متخيل العدد والكنز المهمل وكان هيفرق ازاي لو المصانع دي شغالة في توافر السلع وتشغيل الايدي العاملة والتصدير كمان.. طيب ليه العدد الكبير دا من المصانع واقف؟.. الحيققة فيه أسباب كتير لتوقف المصانع دي وحصرها خبراء الصناعة في المشكلات اللي حصلت بسبب الإصلاحات الاقتصادية والمالية على مدار السنين اللي فات وده بخلاف فتح الأبواب على مصراعيها أمام المنتجات المستوردة، وغياب الرقابة على المنافذ الجمركية، بالإضافة إلى ارتفاع سعر الدولار واللي أضر بالمصانع وخلاها مش قادرة على المنافسة، كمان تحرير سعر الصرف للجنيه المصري تسبب حسب تحليل خبراء الصناعة في تآكل رأس المال العامل لأغلب المصانع بشكل كبير جدا، واضطر أصحاب المصانع لسد الفجوة بالاقتراض من البنوك ومن بين الاسباب توقف المبادرات اللي كانت ممنوحة للمصانع بالاضافة لارتفاع تكلفة الاقتراض واللي بيعتبر معوق رئيسي في الصناعة ورفع من التكلفة واللي بدورها اخرجت المنتج المصري من المنافسة سواء في السوق المحلي أو في التصدير.